Նոր ծառայություն Gebrüder Weiss-ի կողմից
Gebrüder Weiss-ը մեկնարկում է շաբաթական ցամաքային հավաքական բեռնափոխադրումների նոր ծառայություն Չինաստանից Վրաստան «Gebrüder Weiss» միջազգային բեռնափոխադրող ընկերությունն ընդլայնում է իր տրանսպորտային ծառայությունները Չինաստանի և Վրաստանի միջև։ Այժմ հասանելի է դեպի Թբիլիսի իրականացվող նոր շաբաթական ցամաքային հավաքական բեռնափոխադրման ծառայությունը, որը առաջարկում է արդյունավետ այլընտրանք օդային, ծովային և երկաթուղային բեռնափոխադրումներին ։ Նոր երթուղին ապահովում է ամբողջ Չինաստանի տարածքից բեռների անխափան տեղափոխում դեպի Վրաստան՝ Կենտրոնական Ասիայի միջոցով։ Ծովային բեռնափոխադրումների համեմատ՝ ցամաքային հավաքական բեռնափոխադրումը ապահովում է փոխադրման ավելի կարճ ժամկետներ, միևնույն ժամանակ առաջարկելով զգալիորեն ավելի մատչելի սակագներ, քան օդային տրանսպորտը: Այս ծառայությունը հատուկ նախատեսված է Հարավային Կովկասի տարածաշրջանում չինական ապրանքների ներմուծման աճող պահանջարկը բավարարելու և այն ընկերությունների համար, որոնք ներմուծում են էլեկտրոնիկա, սպառողական ապրանքներ, ինչպես նաև մեքենաների և տրանսպորտային միջոցների պահեստամասեր: Ապրանքները հավաքագրվում են ողջ Չինաստանի տարածքից և համախմբվում Gebrüder Weiss-ի հիմնական պահեստներում՝ Շանհայում, Շենժենում, Սուչժոուում և Ուրումչիում։ Այնուհետև բեռները տեղափոխվում են բեռնատարով Խորգոս՝ Չինաստան-Ղազախստան սահմանային անցակետով: Խորգոսից Թբիլիսի տեղափոխման ժամանակը կազմում է մոտ 22-25 օր։ «Շատ ընկերություններ առաջին հերթին փնտրում են տարանցման կայուն ժամկետներ և կանխատեսելի ծախսեր: Հավաքական բեռների մեր ծառայությունն առաջարկում է հուսալի լուծում, որը գործում է անկախ երկաթուղային չվացուցակներից կամ վագոնների սահմանափակ տարողունակությունից»,— նշում է «Gebrüder Weiss» ընկերության Վրաստանի տարածաշրջանային տնօրեն Ալեքսանդր Խարլամովը: Ընկերության լոգիստիկ տերմինալում Թբիլիսիում՝ որը 2024թ-ին ընդլայնվել է արդեն երրորդ անգամ, բեռները բաշխվում են ողջ Վրաստանի տարածքով՝ ներառյալ մաքսային ձևակերպումները, այնուհետև ուղարկվում հարևան Հայաստան։ Այս նոր երթուղով «Gebrüder Weiss»-ը շարունակում է ամրապնդել իր ներկայությունը այսպես կոչված «Միջին միջանցքում»՝ առևտրային առանցքային երթուղի, որը Կովկասի միջոցով կապում է Չինաստանը Եվրոպայի հետ: Մեր նպատակն է այս զարգացող շուկաներում գործող ձեռնարկություններին տրամադրել տրանսպորտային լրացուցիչ հնարավորություններ և մատակարարման ավելի դիվերսիֆիկացված շղթաներ: «Gebrüder Weiss»-ը համաշխարհային լոգիստիկ ծառայություններ մատակարող ընկերություն է, որն ունի ավելի քան 8,600 աշխատակից և 180 ներկայացուցչություն ամբողջ աշխարհում, այդ թվում՝ մասնաճյուղեր Հայաստանում, Վրաստանում, Ղազախստանում, Թուրքիայում և Ուզբեկստանում: Հավելյալ մանրամասներ կարող եք գտնել այստեղ։ 3_GW Tbilisi 4_GW Tbilisi_2 (1)
ԳՏՄ անդամների տարեկան ժողով
Փետրվարի 26-ին տեղի ունեցավ Գերմանական տնտեսական միավորման ամենակարևոր միջոցառումներից մեկը՝ ԳՏՄ անդամների տարեկան ժողովը։ Միջոցառմանը բացման խոսքով հանդես եկավ Գերմանական տնտեսական միավորման վարչական խորհրդի նախագահ՝ պարոն Արտաշես Մարգարյանը։ Իր ելույթի ընթացքում պարոն Մարգարյանը խոսեց միավորման գալիք տարիների նպատակների և առաջնահերթությունների մասին։ Միջոցառմանը ելույթ ունեցավ նաև Հայաստանում Գերմանիայի Դաշնային Հանրապետության փոխդեսպան պարոն Լարս Հեննիգը։ Պարոն Հեննիգը խոսեց հայ-գերմանական տնտեսական և քաղաքական հարաբերությունների զարգացման, ինչպես նաև համագործակցության հեռանկարների մասին։ Հաշվետու զեկույցով հանդես եկավ նաև ԳՏՄ գործադիր տնօրեն տիկին Մերի Նավասարդյանը, որը ներկաներին ներկայացրեց 2025 թվականի ձեռքբերումները, իրականացված միջոցառումները և կարևոր համագործակցությունները, ինչպես նաև 2026 թվականին ակնկալվող կարևոր իրադարձությունները։ Կարճ ելույթով հանդես եկավ նաև ԳՏՄ գործընկեր՝ Berlin Economics-ի վերլուծաբան Դմիտրի Չերյվակովը, որը մասնակիցներին ներկայացրեց վերջին վերլուծությունների արդյունքները։ Միջոցառումը ուղեկցվեց ակտիվ քննարկումներով և հարց-պատասխանով, ինչը ապահովեց անմիջական երկխոսություն մասնակիցների միջև։
Be My Guest «Վիտրոմեդ» բժշկական կենտրոնում
Փետրվարի 13-ին Գերմանական տնտեսական միավորումը իր անդամների հետ միասին այցելեց «Վիտրոմեդ» բժշկական կենտրոն։ Բժշկական կենտրոնի տնօրեն պարոն Հակոբ Մելիքյանը մասնակիցների համար կազմակերպեց շրջայց և ներկայացրեց բժշկական կենտրոնի պատմությունը, մատուցվող ծառայությունները, ինչպես նաև առանձնահատուկ շեշտվեց Գերմանիայի Լյուբեկի համալսարանական կլինիկայի հետ առկա համագործակցությունը։ Ներկաների համար կազմակերպվեց շրջայց, որի ընթացքում ծանոթացանք կենտրոնի հարմարություններին, սարքավորումներին և վիրահատական սրահներին։ Շրջայցից հետո՝ հյուրասիրության ներքո, մասնակիցները շարունակեցին հետաքրքիր զրույցներն ու քննարկումները։
Be My Guest Մետրոշինում
Հունվարի 22-ին Գերմանական տնտեսական միավորումն այցելեց «Մետրոշին» շինարարական ընկերություն։ Միավորման ներկայացուցիչների և անդամ ընկերությունների համար կազմակերպվել էր շրջայց, ինչպես նաև պրեզենտացիա, որի ընթացքում ներկայացվեցին միավորման պատմությունը, արդեն իրականացված ծրագրերը, ինչպես նաև տեսլականն ու առաքելությունը։ Այցի ընթացքում մեր և «Մետրոշին» ընկերության գործադիր տնօրենի կողմից կնքվեց համագործակցության պայմանագիր, որի արդյունքում ընկերությունը պաշտոնապես անդամակցեց Գերմանական տնտեսական միավորմանը։ Միջոցառման պաշտոնական հատվածից հետո մասնակիցների համար նախատեսված էր հյուրասիրություն, որի ընթացքում ներկաները շարունակեցին իրենց շփումները ոչ պաշտոնական միջավայրում։
Հանդիպում «Գրին Ռոք» ընկերությունում
Հունվարի 14-ին տեղի ունեցավ հանդիպում Գերմանական տնտեսական միավորման վարչական խորհրդի նախագահ Արտաշես Մարգարյանի և «Գրին Ռոք» ընկերության գործադիր տնօրեն Կատերինա Դանեկինայի միջև։ Հանդիպմանը ներկա էին նաև ԳՏՄ ծրագրերի համակարգող Շուշաննա Թադևոսյանը և «Գրին Ռոք» ընկերության կառավարության և արտաքին կապերի ղեկավար Նարե Հարոյանը։ Հանդիպման ընթացքում խոսվեց երկու կառույցների գործունեության մասին, ինչպես նաև քննարկվեցին հնարավոր համագործակցության հեռանկարները։ Հանդիպման շրջանակում կնքվեց համագործակցության պայմանագիր, որի արդյունքում «Գրին Ռոք» ընկերությունը պաշտոնապես համալրեց Գերմանական տնտեսական միավորման անդամների շարքը։
Գերմանական տնտեսական միավորման ամանորյա նեթվորքինգ հանդիպում
Դեկտեմբերի 19-ին տեղի ունեցավ Գերմանական տնտեսական միավորման ամանորյա նեթվորքինգ միջոցառումը։ Ինչպես ամեն տարի, այս տարի ևս միջոցառմանը հրավիրված էին միավորման անդամ-կազմակերպությունների ներկայացուցիչներն ու միավորման տեղի և միջազգային գործընկերները։ Միջոցառման ընթացքում ողջույնի խոսքով ելույթ ունեցան Գերմանիայի փոխդեսպան և միևնույն ժամանակ ԳՏՄ խորհրդատվական մարմնի անդամ Լարս Հենիգն ու ԳՏՄ վարչական խորհրդի նախագահ Արտաշես Մարգարյանը։ Կարճ ելույթով հանդես եկավ նաև ԳՏՄ գործադիր տնօրեն տիկին Մերի Նավասարդյանը։ Իր ելույթի ընթացքում տիկին Նավասարդյանը զեկուցեց միավորման 2025 թվականի ծավալած գործունեության, միջոցառումների, կատարված կարևոր ծրագրերի և համագործակցությունների մասին։ Միավորման նոր անդամները նույնպես հնարավորություն ունեցան հակիրճ ներկայանալու և միավորման անդամներին ներկայացնելու իրենց ընկերությունը։ Միջոցառումը շարունակվեց ջերմ մթնոլորտում՝ ապահովելով հարթակ նոր շփումների, հետաքրքիր քննարկումների և նոր համագործակցությունների համար:
«Միջազգային արբիտրաժ, արտահանման և ներմուծման պայմանագրեր, ինչպես նաև օտարերկրյա ներդրումների պաշտպանություն» խորագրով
Դեկտեմբերի 5-ին և 6-ին տեղի ունեցավ «Միջազգային արբիտրաժ, արտահանման և ներմուծման պայմանագրեր, ինչպես նաև օտարերկրյա ներդրումների պաշտպանություն» համաժողովը, որը կազմակերպվել էր Միջազգային իրավական համագործակցության գերմանական հիմնադրամի (IRZ) և Գերմանական տնտեսական միավորման (DWV) կողմից: Համաժողովի ընթացքում Գերմանիայից ժամանած փորձագետների կողմից ներկայացվեցին զեկույցներ իրավական ոլորտում հետևյալ թեմաների շուրջ՝ վեճերի լուծում, արտահանման և ներմուծման պայմանագրեր, ներդրումների պաշտպանություն և շրջանակային պայմաններ։ Միջոցառմանը հրավիրված էին Գերմանական տնտեսական միավորման անդամներ, ՀՀ արդարադատության նախարարության, ՀՀ փաստաբանների պալատի, ՀՀ առևտրաարդյունաբերական պալատի ներկայացուցիչներ։ Համաժողովը վարում էր Գերմանական տնտեսական միավորման տնօրեն Մերի Նավասարդյանը։
Հայկական շինարարական ընկերությունների պատվիրակության այցը Գերմանիա
Նոյեմբերի 11–ից 15-ը Bayern International-ի «Bayern Fit for Partnership» ծրագրի շրջանակում հայկական շինարարական ընկերություններից կազմված պատվիրակությունը՝ Գերմանական տնտեսական միավորման գործադիր տնօրեն Մերի Նավասարդյանի ղեկավարությամբ, այցելեց Բավարիա՝ ծանոթանալու շինարարական ոլորտի առաջատար բավարական ընկերությունների գործունեությանն ու արտադրանքին։ Պատվիրակությունը բաղկացած էր ավելի քան 20 մասնակիցներից, որոնք ներկայացնում էին Հայաստանի Հանրապետության առաջատար շինարարական ընկերությունները։ Այցի ընթացքում մասնակիցները հնարավորություն ունեցան այցելելու գերմանական մի շարք հեղինակավոր ընկերություններ, այդ թվում՝ Liebherr, Peri, Meiller, Wacker Neuson, Metawell, STEICO, KLB Kötztal, Sommer Informatik և Rohde։ Այցը հնարավորություն ընձեռեց ծանոթանալու շինարարության ոլորտի առաջատար տեխնոլոգիաներին և նորարարական լուծումներին, գերմանական փորձին, փոխանակելու նոր գաղափարներ և ստեղծելու նոր առևտրային հարաբերություններ երկու երկրների միջև։
EuroNest խորհրդարանական վեհաժողով՝ «Armenia–EU Synergy: Advancing Resilience, Innovation, and Integration» թեմայով
Հոկտեմբերի 29-ին Հայաստանի Ազգային ժողովում տեղի ունեցավ EuroNest խորհրդարանական վեհաժողովը՝ «Armenia–EU Synergy: Advancing Resilience, Innovation, and Integration» թեմայով, որը կազմակերպվել էր Գերմանիայի Տնտեսության արևելյան հանձնաժողովի, Եվրոպական խորհրդարանի և Եվրոպական բիզնես ասոցիացիայի կողմից։ Միջոցառմանը մասնակցեցին նաև Գերմանական տնտեսական միավորումն ու միավորման մի քանի անդամներ։ Եվրոպական խորհրդարանի, Հայաստանի կառավարության, ԵՄ պատվիրակության և Եվրոպայից, Հայաստանից և տարածաշրջանից առաջատար ընկերությունների ներկայացուցիչները քննարկեցին այնպիսի թեմաներ, ինչպիսիք են՝ ներդրումների խթանումը, նորարարությունը, թվային փոխակերպումը, կիբեռանվտանգությունը և ԵՄ–Հայաստան համագործակցության խորացումը։ Մասնակիցների թվում էին նաև Սերգեյ Լագոդինսկին՝ «Եվրանեսթ» խորհրդարանական վեհաժողովի համանախագահ, Ալյոնա Ակուլիչը՝ Գերմանիայի տնտեսական արևելյան հանձնաժողովի Արևելյան Եվրոպայի տարածաշրջանի ղեկավար, և Հայաստանում ԳԴՀ արտակարգ և լիազոր դեսպան տիկին Կլաուդիա Բուշը։
«ՀՀ ՏՏ ոլորտի մոնիթորինգ և տնտեսական կանխատեսումներ»
Հոկտեմբերի 16-ին տեղի ունեցավ «ՀՀ ՏՏ ոլորտի մոնիթորինգ և տնտեսական կանխատեսումներ» խորագրով միջոցառումը, որը Գերմանական տնտեսական միավորումը կազմակերպել էր իր անդամների համար։ Միջոցառման ընթացքում Գերմանական տնտեսական միավորման գործընկեր Berlin Economics-ի վերլուծաբան Դմիտրի Չերվիակովը մասնակիցներին ներկայացրեց վերջին ամիսների կատարած վերլուծության արդյունքները ՀՀ տնտեսության, ինչպես նաև տեղեկատվական տեխնոլոգիաների ոլորտից։ Հանդիպմանը ելույթ ունեցավ նաև Գերմանական տնտեսության արևելյան հանձնաժողովի Արևելյան Եվրոպայի երկրների տարածաշրջանային ղեկավար Ալյոնա Ակուլիչը, որն այցով առաջին անգամ էր գտնվում Հայաստանում։ Իր ելույթի ընթացքում տիկին Ակուլիչը խոսեց իրենց ասոցիացիայի գործունեության մասին, ինչպես նաև մասնակիցների ներկայացրեց ասոցիացիային անդամակցող գերմանական ընկերությունների հետաքրքրության դաշտերն ու համագործակցության ոլորտները Հայաստանում։